Þessi síða er semsagt Ruslakista vefsins - hún verður notuð fyrir vangaveltur, persónuleg skilaboð og vísanir á önnur skyld verkefni. Hér er skipulag losaralegt og efnið skrifað í fyrstu persónu eintölu. :-)

"Efla frægð mína og frama, græða kannski smá pening og efla netmenninguna á Íslandi. Koma í veg fyrir íslenskt spam einfaldlega með því að gera það óþarft."

(Viðbótarmarkmið eru að geta keypt fleiri skó handa kærustunni, og hafa á endanum nógu miklar tekjur upp úr þessu til að geta leikið á netinu allan sólarhringinn. Það kemur bara í ljós hvort þau eru raunhæf...)

Þessi síða á að sjá um þetta með frægðina...

Hugmyndin að baki molar.is er bein afleiðing af meirihluta (nettengdu) starfanna sem ég hef fengist við. Þegar ég starfaði sem kerfisstjóri Internetþjónustu Margmiðlunar fólst hluti af starfinu í að reka póstlista fyrir viðskiptavini okkar - og að sjálfsögðu nýtti ég mér aðstöðuna til að stofna nokkra lista sjálfur, um áhugamálin mín. Stærstur þeirra (í áskrifendum talið) er í dag partalistinn, og næst stærstur er listi KDE þýðingarhópsins.

Ég var einnig á sínum tíma kosinn "tæknimaður" hjá Félagi Íslenskra Netverja, og eftir að hafa skaffað vélbúnað fyrir þá fólst starfið aðallega í að reka póstlista félagsins.

Nú síðast réðst ég í það verkefni að skrifa nýstárlegt póstlistakerfi, til að hjálpa Má, vini mínum að setja upp "póstlista sem er listaverk". Kerfið sem varð til upp úr því hefur ýmsa kosti sem ég hef ekki séð í öðrum póstlistakerfum. Þú munt í framtíðinni geta sótt eintak af Anomy listakerfinu hér. Anomy er notaður hér á molar.is.

Ég hef semsagt mikið fengist við, og fæst enn við rekstur póstlista. Því ekki að færa út kvíarnar og bjóða almenningi þjónustuna? Það er ekki mikið meira mál að reka 100 póstlista en að reka 10 (ef kerfið er gott), og ég er kominn tiltölulega nálægt síðari tölunni nú þegar...

netmenningin

Auðvitað má gera þetta sama á vefnum, eða usenet - en það er einfaldlega ekki eins þægilegt. Maður nennir ekki að skoða margar mismunandi vefsíður á hverjum degi, sérstaklega ef þær breytast mjög hægt. Svipað má segja um Usenet, þó staðan þar sé skárri að mörgu leyti. En ef umræðan berst manni með tölvupósti, þá þarf maður nánast ekkert að hafa fyrir því að fylgjast með. Póstlistar eru einfaldari, ódýrari og alveg ofboðslega þægilegir.

spamið

Heift Netverja gegn ruslpósti er algjörlega réttlætanleg, en þó óumbeðnar spam-sendingar séu slæmar þá gildir það ekki um önnur form auglýsinga í tölvupósti.

Auglýsingar eru bara eitt form upplýsinga sem menn vilja skiptast á, og ég tel SPAM-ið vera verkfæri glæpamanna annarsvegar, og manna sem misskilja Netið hinsvegar. Þeir sem skilja miðlilinn og virða óskir Netverja sitja hinsvegar eftir með sárt ennið, og hafa nánast enga löglega leið til að auglýsa með tölvupósti. Úr þessu þarf að bæta til að menn freistist síður til að fara ólöglegu leiðina.

Ég verð ekki bara pirraður á því að fá auglýsingu með tölvupósti - ég verð pirraður á að borga fyrir auglýsingu sem ég hef engan áhuga á. Ef auglýsendur myndu aðallega senda mér áhugaverðar auglýsingar eða "borga" mér með e-m hætti fyrir bandvíddina sem fer í að sækja þær, þá væri staðan allt önnur.

Um þetta mun auglýsingaþjónusta molar.is snúast. Ég rek póstlista fyrir þig, gegn því að þú takir á móti auglýsingum frá mér og viðskiptavinum mínum. Ég reyni svo að ganga þannig frá þjónustunni að auglýsendur geti valið að senda bara vissu fólki auglýsingar - vonandi fólki sem hefur áhuga á þeim.

Ef þú vilt ekki sjá neinar auglýsingar, þá geturðu líka alltaf valið um að segja upp áskrift að listunum mínum eða borga mér fyrir reksturinn. Svo er hitt, að ég mun ekki byrja strax að selja auglýsingar - hver veit, kannski geturðu fengið mig til að skipta um skoðun... en ekki gleyma að uppbygging og rekstur molar.is kostar mig tíma, vinnu og pening.

Bjarni R. Einarsson
bre@netverjar.is

• Onelist veita sambærilega þjónustu við þessa, fyrir enskumælandi.
• [...]

Sniðugur hugbúnaður:

• Anomy póstlistakerfið mitt sér um að dreifa pósti.
• Lítillega breytt hypermail sér um vefsafnið (þar til Anomy verður nógu öflugt til að taka við).
• Þau vinna með eða byggja á Apache, GNU tólunum, Perl, sendmail, procmail og að sjálfsögðu Linux.

• Már Örlygsson - fyrir mörg gagnleg samtöl, og fyrir vinnu við hönnun vefsins (gallar á vefnum eru samt mér að kenna).
• Einar Kjartansson
• Internet á Íslandi
• Áskrifendur póstlistans molar-throun.