Hér má finna svör við algengum spurningum varðandi molar.is:

Hvað er póstlisti?

Póstlisti er verkfæri til að greiða fyrir samskiptum hópa á Netinu. Sérhver póstlisti hefur eigið netfang, en þeir sem eru áskrifendur að listanum fá afrit af öllum bréfum sem eru send til hans.

Hvaða kosti hafa póstlistar fram yfir vefspjall eða ráðstefnur?

Póstlistar þjóna að mestu leyti sama hlutverki og vefspjallkerfi og ráðstefnur (e. Usenet). Munurinn er aðallega sá, að til að fylgjast með umræðu ertu ekki neyddur til að fara daglega og heimsækja ákveðna vefsíðu eða ákveðna ráðstefnu - umræðan kemur sjálf til þín, í formi tölvupósts. Póstlistar spara því mikinn tíma fyrir þá sem vilja fylgjast með allri umræðunni og taka virkan þátt í henni.

Ekki má gleyma því að þar sem fæstir eru komnir með fast samband við netið, þá er þessi tímasparnaður beinn peningasparnaður um leið, því þú þarft ekki að borga símareikning fyrir tímann sem fer í að lesa og svara bréfum, frekar en þú vilt.

En smekkur manna er misjafn! Til að koma til móts við þarfir þeirra sem vilja frekar fylgjast með umræðu á vefnum, býður molar.is líka upp á vefsjallkerfi, sem er beintengt við póstlistana. Bréf send póstlistunum birtast á vefnum (í söfnunum), og bréf skrifuð á vefnum eru send áskrifendum - þannig geta allir valið þá aðferð sem hentar þeim best til að taka þátt í umræðunum.

Hvernig panta ég áskrift að póstlista?
Hvernig kemst ég af póstlistanum aftur?

En ef ég vil ekki nota vefinn?

En ef netfangið mitt hefur breyst?

Hvernig stofna ég póstlista? Hvað kostar það?

Hvaða reglur gilda um notkun molar.is?

Geta menn stofnað lista um hvað sem er?
Hvað um barnaklám eða nasisma?

Það verður engin ritskoðun á molar.is. Það er málfrelsi á Íslandi og menn mega ræða hvað sem er.

Það þarf vonandi ekki að taka það fram að það er bannað að nota kerfið til að gera ólöglega hluti - notendur Netsins þurfa að lúta lögum þess lands sem þeir eru staddir í hverju sinni. Sér í lagi má ekki nota kerfið til að dreifa ólöglegu efni eða til ærumeiðinga.

Öll samskipti sem fara gegnum molar.is eru skráð í söfn viðkomandi póstlista. Stofnendur lista geta valið hvort viðkomandi safn sé opið almenningi eða ekki, en ef lögregla gerir kröfu um að fá afrit af safninu þá munu umsjónarmenn þjónustunnar að sjálfsögðu verða við því. Molar.is getur því aldrei orðið öruggt verkfæri glæpamanna.

Af hverju á ég ekki að tala um XYZ á lista ABC?

Hver póstlisti hefur afmarkað umræðuefni. Það þykir lágmarkskurteisi að halda sig við það efni þegar póstlistanum eru send bréf - með bréfi þínu nærð þú athygli margra aðila, sem flestir hafa nóg annað að gera en að lesa skrif þín. Það er alveg viðbúið að það fari í taugarnar á fólki ef þú truflar það með einhverju sem það hefur ekki áhuga á.

Hvernig á að velja nafn (netfang) fyrir nýjan póstlista?

Eftirfarandi atriði er vert að hafa í huga þegar nafn á nýjum póstlista er valið:

• Er nafnið lýsandi fyrir umræðuefni listans?
• Er auðvelt að muna nafnið?
• Er hætta á að menn rugli nafni listans saman við aðra póstlista?

Athugið að Molar.is mun hafna umsókn ef beðið er um nafn sem kann að gefa mjög villandi hugmynd um tilgang listans. T.d. myndum við ekki samþykkja að nota nafnið "myndavel@molar.is" yfir póstlista sem fjallar um ostagerð. Þessi vinnuregla er sett til að auka gagnsemi vefsins (þar sem yfirlit yfir nöfn lista koma fram) og til að hindra að eftirsótt nöfn verði frátekin að ástæðulausu.

Hvað er ruslpóstur?

Ruslpóstur (e. spam) er samheiti yfir hverskyns óumbeðinn tölvupóst sem sendur er á stóra hópa fólks. Ruslpóstur getur verið af ýmsu tagi, t.d. eru göbb (t.d. lognar vírus-aðvaranir), keðjubréf, auglýsingar og áróður af ýmsu tagi yfirleitt flokkaðar sem ruslpóstur.

Ruslpóstur er ákaflega óvinsæll, af ýmsum ástæðum. Þar vegur þyngst að sá sem sendir ruslpóst er að velta stærstum hluta af kostnaðinum við að koma skilaboðum sínum á framfæri yfir á móttakendur, sem vita ekki hvað þeir eru að sækja fyrr en það er orðið of seint. Þetta er þveröfugt við auglýsingarnar sem berast inn um bréfalúgur heimila - þar borgar sendandi sendingarkostnaðinn og þarf þar að auki að fylgja lögum sem lúta að fjöldadreifingu pósts.

Er hægt að nota molar.is til að senda ruslpóst?

Almenna reglan hér er sú, að þegar póstlisti er stofnaður þá sé hann tómur, og menn komist ekki á listann nema þeir sjálfir staðfesti skráningu. Undantekning frá þessari reglu verður gerð þá og því aðeins að hægt sé að sannfæra umsjónarmenn molar.is um að netföngin séu ekki illa fengin - og eftir því sem listarnir stækka þá verður erfiðara að sannfæra okkur!

Um alla lista gildir að menn geta skráð sig af þeim án aðstoðar.

Þetta útilokar í raun að póstlistar séu stofnaðir til þess eins að senda ruslpóst - því ruslpóstur er samkvæmt skilgreiningu óumbeðinn póstur, en með því að gerast áskrifandi ert þú að biðja um póstinn - óháð innihaldi hans.

Eru listarnir varðir gegn ruslpósti? Hvernig?

Póstlistarnir hér eru allir varðir gegn ruslpósti á einfaldan, en þó áhrifaríkan hátt. Það skal samt tekið fram að slíkar varnir geta þó aldrei orðið fullkomnar, og molar.is getur ekki ábyrgst neitt í þessu samhengi.

Listakerfið er stillt þ.a. það tekur ekki á móti bréfum nema það sjáist í To: eða Cc: línum bréfanna á hvaða lista þau eru send. Mikill meirihluti ruslpóstsins á netinu er sjálfur sendur gegnum einhverskonar póstlistakerfi, þar sem netfang móttakandans kemur ekki fram, heldur eitthvað plat eins og t.d. "Friend@aol.com". Slíkt rusl mun ekki trufla póstlistana.

Þetta fyrirkomulag tryggir einnig að ef ruslpóstur verður vandamál á einhverjum póstlista, þá mun það sjást í ruslpóstinum sjálfum hvaða lista er verið að misnota. Þá er hægt að láta umsjónarmann vita eða einfaldlega skrá sig af listanum.

Listakerfið hafnar einnig bréfum sem stillt eru á mjög mörg netföng samtímis, ásamt bréfum sem eru yfir 128k (yfir 100000 stafir) að stærð.

Safnkerfið er stillt til að vernda netföng þeirra sem taka þátt í umræðum á póstlistunum. Netföng sendenda eru aldrei birt á vefsíðum safnsins.

Af hverju hverfa viðhengin sem ég sendi? Og HTML útgáfur bréfanna?

Póstlistakerfið sem er notað á þessum vef er glænýtt og er enn í örri þróun. Það verður að öllum líkindum með fyrstu póstlistakerfum á markaðinum sem kann að vinna með flókin MIME skjöl - en sú virkni er enn skammt á veg komin, og það vantar enn nokkuð uppá til að það meðhöndli viðhengi á skynsamlegan hátt.

HTML hluti bréfa er fjarlægður úr þeim viljandi, til þess að spara bandvídd og tryggja að allir móttakendur bréfsins skilji það. Að hafa bréfin á textaformi einfaldar einnig alla úrvinnslu bréfanna t.d. vegna safnanna og leita í þeim.

Hvaða hugbúnað og vélbúnað notar molar.is?