Gagnrýni og úrbætur.	Almennt Uppsetning  Notkun   Öryggi  Forrit Aðstoð Íslendingar
Helstu gallar Linux í dag

Fljótt á litið eru gallar Linux fjölmargir. Þetta vita Linux notendur, og margir vinna baki brotnu við að bæta úr vandamálunum. Þróunin hefur verið það ör, að flestir gallar sem ég tel upp hér fyrir neðan eru í þann mund að leysast, eða eru einfaldlega leyst fyrir löngu.

Mörg hefðbundin tölvuverkefni er samt ekki hentugt að leysa með Linux í dag. Þetta stafar aðallega af því að kerfið er ungt, og þeir sem hafa séð um þróun þess hafa haft ýmislegt sameiginlegt - meðal annars það að það tekur enginn þátt í þróun stýrikerfis án þess að vera vel að sér í notkun tölva.

Þetta veldur því að byrjendum kann að finnast Linux mjög flókið og fráhrindandi, enda lítur það sjaldnast út eins kerfin sem menn kynnast í skólum og á skrifstofum. Fyrir þennan hóp er margt sem tölvumönnum finnst kostur orðinn galli.

Þetta vandamál má minnkar mjög mikið, ef sæmilega fær Linux notandi stillir vélina þ.a. hún líkist því sem menn hafa kynnst annarsstaðar (t.d. Windows). Varðandi uppsetninguna sjálfa skal hafa það í huga að það tíðkast að almennir notendur setji tölvur sínar upp sjálfir. Flestir kaupa tölvur í heilu lagi, með stýrikerfið og öll nauðsynleg forrit þegar uppsett.

Gagnrýni

1. Íslenskustuðningur Linux forrita er misgóður (sérstaklega í X umhverfinu). Sum forrit virka illa.. önnur eru frábær.

2. Kerfið er flókið og óaðgengilegt byrjendum.
   • Textadrifin vinnsla er "fráhrindandi" (skeljar).
   • Lítið samræmi er milli forrita hvað varðar notkun og stillingar, og þessvegna er..
   • oft vesen að setja ný forrit upp.
3. Skortur er á forritum.
4. Skortur er á opinberum ábyrgðaraðila (commercial support).
5. Mikið er til af þekktum öryggisholum í Linux.

Þessi gagnrýni á öll að einhverju leyti rétt á sér, og Linux heimurinn er reyndar að bregðast við þeim öllum. Því miður eru menn mis-langt á veg komnir með úrbætur.

Úrbætur

1. Íslenskuvandamálið var sérstaklega hvimleitt, en nýlegar Linux dreifingar eru að miklu leyti lausar við hann. Þó skýtur hann öðru hvoru upp kollinum, þegar maður prófar ný forrit, sem hafa enn ekki náð fullum "þroska" í Linux umhverfinu. (ATH: Taktu endilega þátt í að íslenska KDE!)

2. Vinna í textaham er engan veginn skilyrði fyrir notkun Linux. Það er smekksatriði hvort menn vilja vera í grafísku umhverfi eða textadrifnu (eða blöndu beggja). Þitt er valið.

   Mikil vinna hefur verið lögð í að einfalda notkun og rekstur Linux kerfa.

   • KDE og GNOME hóparnir eru að búa til söfn af forritum með samræmdu, nútímalegu viðmóti. Þróun þessara verkefna hefur verið mjög ör undanfarna mánuði, en KDE er líklega lengst komið.
   • Margir líta á fjölbreytni og sveigjanleika Linux forrita sem stóran kost. Það má geta þess að í Linux sem og öðrum Unix kerfum eru forrit yfirleitt að vinna með vel skilgreind gagnaform (t.d. HTML, GIF, MIME, ..) og geyma gögn á vel skilgreindum stöðum - sem skiptir oft meira máli en að forritin líti eins út.
   • RedHat, Caldera og fleiri nota rpm til að einfalda uppsetningar og viðhald Linux kerfa, og Debian nota til þess svipað kerfi sem heitir dpkg.

3. Skortur á forritum er mismikið vandamál eftir því hvað menn eru að fást við.. vissulega er hvorki til Microsoft Office né Adobe Photoshop fyrir Linux, og verða kannski aldrei, en það eru til önnur kerfi til að leysa sömu verkefni, og gæði þeirra fara síbatnandi.

   Undanfarið hefur þessi skortur farið minnkandi mjög hratt, og ýmis stór fyrirtæki hafa lýst yfir stuðningi við Linux og gefið út Linux útgáfur af sínum vörum. Þar ber helst að nefna Netscape, Corel, Oracle, Informix og Lotus, en það bætist stöðugt í hópinn.

4. Fullyrðing 4. er ekki lengur sönn í t.d. Bandaríkjunum, því RedHat og önnur fyrirtæki hafa farið að bjóða upp á faglega aðstoð og ráðgjöf varðandi Linux. Hér á landi eru engin fyrirtæki (svo ég viti) sem sérhæfa sig í þessu, en ég veit að einstaklingar (verktakar) hafa tekið að sér slík verkefni.

5. Varðandi 5. atriði vísa ég á síðuna um öryggismál.

   ---

   Bjarni R. Einarsson, nóvember 1998.

   Þessa vefsíðu má endurnýta og dreifa samkvæmt OP/L skilmálunum.