Jæja, það er komin niðurstaða í tilrauninni sem ég bloggaði um um daginn!

Hana má sjá myndrænt á nýja tölfræðisíðu Pilluáminningarinnar.

Þar má sjá að það reyndist vera smá skekkja í SMS sendingum áminningarinnar, annað símfélagið var nokkru duglegra en hitt við að taka á móti skilaboðum fyrir viðskiptavini keppinautarins. Það munaði meira að segja aðeins meiru en ég bjóst við.

Ég er smám saman að leiðrétta gagnagrunninn minn og er búinn að breyta skráningarferlinu smá til að halda þessu í lágmarki framvegis. Ég býst við að skekkjan verði alveg farin eftir 2-3 daga.

Mér datt reyndar í hug að það gæti verið skondið að halda skekkju í hina áttina inni í smá tíma, nógu mikið til að bæta fyrir þann "kostnað" sem upprunalega skekkjan hafði í för með sér undanfarna mánuði fyrir duglega símfélagið.

En þar sem skilaboðunum fylgja auglýsingar frá keppinautnum, þá er ekkert víst að það þætti góður greiði...

...

Ég nota annars Google Charts til að teikna þessi nýju gröf - það er alveg snilldargræja!

Næst á dagskrá er að búa til eitthvað sambærilegt fyrir Partalistann, svo ég geti séð hversu mikið, hvernig og hvenær smáauglýsingavefurinn minn er notaður.

Gröf eru góð.