Ég er á Íslandi.

Nánar tiltekið, er ég í kjallaranum hjá mömmu, með pefsí og appelsín og Góu súkkulaðirúsínur, að rembast við að semja fyrirlestur fyrir Hugbúnaðarráðstefnu Ský.

Ég á að segja frá því hvað Google gera vel til að halda nördunum sínum glöðum; þema ráðstefnunnar eru áskoranir í umhverfi hugbúnaðargeirans hérlendis og stór þáttur þar er auðvitað vandinn við að finna og halda góðu fólki.

Ef ég vildi semsagt vera svo vænn að útskýra á 20 mínútum hvernig öll íslensk hugbúnaðarhús geta verið jafn heillandi vinnustaðir og Google, þá væri það vel þegið...

;-)

Ekkert mál, ég hristi þessu bara fram úr erminni í einum grænum. Svarið er 42, ef ég man rétt.

...

Yndislega íronían í þessu er auðvitað sú að frá sjónarmiði Google, þá er ég meðal annars hér til að hvetja hæfa íslenska nörda til að sækja um vinnu og flytja út.

En mér líður ekkert sérstaklega illa yfir þeirri þversögn. Íslendingar koma alltaf aftur og nördar fá líklega hvergi betra nám en að vinna í nokkur ár hjá konungi leitarvélanna.