Ég fékk nokkra geisladiska í afmælisgjöf. Ég er búinn að afrita þá flesta inn á fartölvuna mína til að geta hlustað meðan ég vinn eða flutt tónlistina í gemsann minn.

Alla nema einn!

Geisladrifið í grey makkanum mínum fríkaði alveg út þegar ég setti þann síðasta í og fraus á endanum. Tölvan vildi ekki einusinni spýta diskinum út og ég var farinn að óttast að ég þyrfti að fara með hana á verkstæðið til að fá aftur afnot af drifinu. Á endanum datt ég þó niður á það ráð að svæfa vélina, vekja aftur og ýta strax á "eject" takkann áður en drifið hafði tíma til að fremja harakiri í annað sinn.

Gallaður diskur?

Að vissu leyti já. Ég skoðaði diskinn nánar og hann leit alveg eðlilega út, engar rispur og ekkert beyglaður. Hann ætti að virka. Svo tók ég eftir litlu lógói sem á stóð "SACEM DRM". Þetta er semsagt diskur með afritunarvörn sem er ekki nothæfur í nema litlum hluta geislaspilara og brýtur gegn lögbundnum rétti mínum til að gera afrit til einkanota.

Viljandi gallaður diskur. Það voru heldur engar aðvaranir á umbúðum disksins sem gáfu til kynna að diskurinn væri fatlaður með þessum hætti.

Ég ætla að fara með diskinn aftur í Skífuna og vera fúll.

Leiðrétting: Ég var víst ekkert mjög fúll, bara kurteis. Fékk nýja diskinn með The Knife í staðinn. Hinsvegar komst ég að því eftirá, að "SACEM/SDRM" er víst ekki tæknileg afritunarvörn, heldur eru þetta frönsk samtök útgefenda (hliðstæða við RIAA kanans). Ég veit því ekki hversvegna diskurinn virkaði ekki... en það var eitthvað skrítið við hann hvort sem það var afritunarvörn eða eitthvað annað.