Bæði Borgar og Stína tóku til í fataskápum sínum nýlega. Í kvöld gerði ég slíkt hið sama. Það var samt ekki fyrr en ég var búinn sem ég áttaði mig á því að líklega var hugmyndin ekki mín heldur þeirra.

Maður verður oft fyrir áhrifum af fólki í kringum sig alveg án þess að maður sé fullmeðvitaður um það. Ég sé fleiri nýleg dæmi um það hérna í blogginu mínu...

Tiltektin mín var að sjálfsögðu mjög nördaleg. Hún var eiginlega svo nördaleg að ég þori varla að útlista öll smáatriðin hér. Látum nægja að segja að sumu var raðað í litaröð og möppur úr skjalaskápnum voru notaðar til að skilja stöfluð föt að. Ég "fann" tvo jakka sem ég hafði gleymt að ég ætti, sem og Linux-bol og Sendmail-bol.

Engu var hent, en götótt og ljót föt lentu í poka sem ég geri ráð fyrir að leita í þegar mig vantar tuskur, efnisbúta eða tölur.

Þetta var eiginlega skammarlega skemmtilegt.