Já, í morgun fékk ég forvitnilegan tölvupóst.

Vinur með læst blogg á Klaka spurði mig hvað ég, sem kerfisstjóri, myndi gera við vefinn hans ef hann dytti niður dauður á morgun.

Svarið mitt var einfalt: ég myndi láta aðstandendur hans eða erfingja fá "lyklana" að öllu saman og leyfa þeim að ráða hvort vefurinn yrði áfram á netinu eða ekki. Ef um mjög tölvuólæsa væri að ræða myndi ég prenta vefinn út og afhenda þannig. Óskir um annað þyrftu eiginlega að koma fram í erfðaskrá, annars gerði ég bara mitt besta til að fara eftir lögum og hefðum um eigur látinna hérlendis.

Við skiptumst á nokkrum bréfum, en þetta var meginniðurstaðan. Þetta tengist samt ýmsu öðru sem bloggarar og aðrir tölvunotendur ættu að hafa í huga. Fólk sem er að nota tölvutækni til að gera hluti sem skipta einhverju máli ætti að spyrja sig eftirfarandi spurninga:

1. Hvað kemur fyrir gögnin mín ef tölva bilar eða ef það kviknar í?
2. En ef fyrirtæki eru keypt eða fara á hausinn?
3. En ef tölvutæknin þróast og breytist og tækin sem ég nota í dag verða úrelt og ófáanleg?
4. Hvað verður um póstinn minn þegar ég dey?
5. Hvað verður um bloggið mitt?
6. En lykilorðin mín?

Og í tilfelli Klaka... hvað kemur fyrir gögnin ykkar og vefi ef ég dey? Nú, vonandi getur þá pabbi hjálpað ykkur og ég hugsa að ég gæti alveg auðveldlega orðið langlífari en til dæmis blogger.com. En þetta eru samt spurningar sem vert er að hafa í huga.

Ég sjálfur reikna með að prenta út (eða skrifa niður) helstu lykilorðin mín, kannski smá "leiðbeiningar" og geyma ásamt öryggisafritum á geisladiskum í bankahólfi. Ef ég fell frá þá mun erfinginn minn eignast allt það góss. Hann heppinn!

Fyrir mig svarar þetta spurningum 1, 2, 4, 5 og 6 að ofan. Svarið við spurningu 3 felst í notkun á opnum stöðlum og viðhaldi á öryggisafritunum; um það leyti sem geisladiskar virðast á undanhaldi þá skiptir maður um geymslumiðil.

Viðbót: Borgar er með aðeins aðra sýn á þessi mál en ég. Ég veit ekkert hvort hans nálgun er réttari, ég komst að minni niðurstöðu með því að líta á dagbækur/blogg/tölvupóst eins og hvern annan hlut sem notendur eiga, þegar þeir deyja þá færist eignin til erfingja. Kannski er það ekki rétt nálgun? En við erum sammála um eitt: fólk sem hefur skoðanir á þessu verður að láta þær í ljós, annars verður ekki tekið tillit til þeirra!