Það var auðvitað ekkert ákveðið og í sjálfu sér engar fréttir að færa af fundinum, aðrar en þær að hann hafi þjónað hlutverki sínu sem fræðslufundur. Það fóru held ég allir örlítið upplýstari af fundinum heldur en þeir komu á hann, við Linux nördarnir þar með taldir.

Ég dreifði eintökum af Knoppix diskinum mínum, en ég hafði pakkað honum fallega inn í rauðan pappír og gat því leikið Linux-jólasvein. Við ræstum fartölvu með diskinum og sýndum á skjávarpa hvernig íslensk KDE notendaskil líta út. Það gekk vel.

Vonandi verður eitthvað úr þessu og vonandi hafa einhverjir gagn eða gaman af þessum Knoppix diski, svona fyrst ég hafði fyrir því að búa hann til...

Reyndar rak ég augun í það fljótlega eftir að ég bjó hann til, að flest sjálfgefin letur í OpenOffice gátu ekki birt nema suma íslenska stafi. Ef einhver gæti sagt mér hvað þurfi að gera til að að laga það, þá væri það í raun alveg tilefni til að búa til nýja útgáfu af diskinum.

Viðbót: Bara svo það sé á hreinu, allir sem vilja geta sótt ISO mynd íslenska Knoppix disksins og brennt eigin Linux-geisladiska. :-)