Mér finndist eðlilegt að skrifa "mér fyndist" svona, ef ekki væri vegna Grímu sem sagði mér áðan að skrifa "mér finndist" með einföldu. Þetta fannst mér nokkuð merkilegt, því þetta er fyrsta i/y stafsetningarvillan sem mér er bent á að ég geri reglulega.

Ég gat líka réttlætt þetta með því að benda á að rétt væri að "mér hefði fundist eitthvað", og "fundist" yrði "fyndist" með einföldu u-y hljóðvarpi. Ég veit hinsvegar ekkert hvort ég sé að hljóðvarpa réttri mynd sagnarinnar, því það er svo langt síðan ég lærði um þessa hluti.

Lýðurinn og Internetið eru reyndar ósammála Grímu. Ég gerði mér til skemmtunar algjörlega ómarktæka Google-skoðanakönnun:

• "Mér fyndist" kemur fyrir 1290 sinnum.
• "Mér finndist" einungis 405 sinnum.
• Fjórum sinnum má finna bæði afbrigðin á sömu síðu, en í öllum tilfellum er um spjallþræði að ræða.

Einnig kannast Vefpúkinn ekki við orðið "finndist", en samþykkir "fyndist" athugasemdalaust.

Mér skilst að Orðabók Menningarsjóðs styðji hinsvegar Grímu og Google leiddi í ljós að Már vinur minn skrifar líka "mér finndist".

Hvað er þá rétt?

Ég hallast að því að taka frekar mark á Grímu, Má og Orðabókinni heldur en lýðnum og Vefpúkanum. Vonandi verður Friðrik yfirmaðurinn minn (og höfundur Púkans) ekkert fúll yfir því. ;-)

Ef einhver lesandi er nógu sleipur í fræðum beyginga og hljóðvarpa, þá væri mjög gaman að fá útskýringu á því af hverju annað er rétt og hitt ekki.