Gunni Gríms vakti máls á því um daginn að það væri pínu skrítið að nýji Landsbankavefurinn skyldi krefjast notendanafns og lykilorðs inn í heimabanka, af ódulritaðri síðu.

Ég tjáði mig aðeins um þetta í spjallkerfinu hans, en tók afrit af innleggjum mínum til að eiga hér líka.

Í stuttu máli þá virðist þetta vera mjög alvarlegt öryggisklúður og starfsmenn bankans ættu eiginlega að vita betur. Vonandi fær einhver hjá Landsbankanum fréttir af þessu og kippir í lag fljótlega.

Viðskiptavinir Landsbankans ættu að forðast að skrá sig inn í netbankann af forsíðunni eða öðrum ódulrituðum síðum. Innskráningareyðublöð eru einfaldlega ekki traust ef þau eru ódulrituð (ekki https://).

Uppfært 2004.10.29: Ég sendi Landsbankanum póst rétt í þessu og benti þeim á þessa færslu.

Uppfært 2004.11.02: Síðustu fregnir herma að bankinn ætli að laga vefinn sinn. Gott mál!