Andskotans Fréttablað. Var að setja eftirfarandi klausu með áberandi lit og letri á forsíðu Pilluáminningarinnar:

ATH: Að gefnu tilefni vill Pilluáminningin taka fram að hún hefur aldrei og mun aldrei mæla gegn notkun smokka. Tilvitnunin sem birtist í Fréttablaðinu 06.04.04 var röng, aldrei hefur verið send áminning þar sem því var haldið fram að smokkar væru "ekkert fyrir konur". Hinsvegar var á tímabili sent skilaboð sem sagði "Pillur fyrir konur, smokkar fyrir alla!" og viðmælandi Fréttablaðsins hefur líklega ruglast á þessu í minningunni.

Smokkar eru nauðsynleg getnaðarvörn og eina algenga getnaðarvörnin sem hindrar smit kynsjúkdóma á borð við klamydíu, lekanda og alnæmi. Pillan getur því ekki komið í stað smokka og Pilluáminningin mun aldrei og hefur aldrei haldið öðru fram.

Einnig virðist hafa orðið prentvilla hjá Fréttablaðinu varðandi lengd pásu vegna blæðinga - en pásan er sjö dagar, ekki fimm eins og haldið var fram í greininni.

Djöfull er ég súr - ég talaði við greinarhöfundinn löngu áður en greinin fór í prentun og sagði henni beint út að þetta rugl-skilaboð hefði aldrei verið sent og ég vildi ekki að hún hefði þetta eftir þjónustuna (mig). Hún hafði ætlað að nota þetta sem fyrirsögn! Ég er þakklátur fyrir að hún breytti því, en skil ekki hvað vakti fyrir henni að birta þetta bull samt í meginmáli greinarinnar.

Frekar illa unnið. Svekkjandi, því það er venjulega gaman að fá smá fjölmiðlaumfjöllun um þjónustuna og þetta lofaði góðu þegar hún lýsti þessu, að taka viðtal við ánægðan notanda og fjalla aðeins um lyfjafræðihliðina á þessu öllu saman.

Annars er það einning í fréttum að vefurinn unglingar.is ætlar víst að vísa á áminninguna. Gaman að því!