Í dag kláraði ég að rífa það sem ég ætlaði að rífa af litla veggnum í svefnherberginu. Á morgun ætla ég að moppa og mæla allt út, teikna myndir og kannski kaupa efni svo ég geti reist nýjan vegg með rennihurðum og skúffum og öðru fíneríi. Stefnan er að gera þennan stóra súðskáp að einhverju sem gagnast okkur dags daglega, í staðinn fyrir að vera bara geymsla sem við veigrum okkur við að nota.

Það var annars mjög gaman að djöflast á þessum vegg. Ég barði hann með hamri, þjösnaðist á honum með kúbeini og sagaði í grindina þegar hún kom loks í ljós. Sviti og ryk og hávaði! Mjög karlmannlegt allt saman!

Reyndar er þetta steinryk bölvað ógeð. Hendurnar á mér eru núna eins og ég hafi verið pússaður með fínum sandpappír - sem er í raun og veru það sem gerðist, smám saman, nema sandurinn var ekki festur á neinn pappír. Ég er aumur og þurr þrátt fyrir að hafa borið fullt, fullt af handáburði á mig.

Ég hlakka til að byrja að smíða!