Nú stefnir í að ég kaupi rauðvín til að hafa með mat næstu þrjú kvöld í röð... og kannski eitthvað annað áfengi líka. Fyrir utan hvað það er ósiðlegt, þá er auðvitað dýrt.

Svona taumlaus eyðsla og stanslaust sukk má ekki líðast! Skamm ég!

Allur sparnaðurinn af því að reka ekki bíl og kaupa föt í rauðakrossbúðinni og sníkja mat af vinum sínum og borða jógúrt á kaffistofunni í vinnunni er að hverfa oní óseðjandi gin djammiðnaðarins, sem allir vita að er nátengdur klámvæðingunni og þar af leiðandi mjög, mjög, mjög, mjög, mjög, mjög slæmur.

Í veikri von um að sporna við þessari ógnvænlegu þróun tók ég mig til rétt áðan og tengdi örbylgjuloftnetskapalinn sem er búinn að vera liggjandi undir sófanum að safna ryki síðastliðin 2 ár. Nema þau séu orðin þrjú. Hvað um það, þetta var kærkomið tækifæri til að nota elsku besta leatherman hnífinn minn, ó mér leið svo karlmannlega, mjög gaman.

Svo kenndi ég vídjóinu að birta allar stöðvarnar sem við höfum verið án til þessa: snjólaust RÚV, Skjá Reinn, Popptíví, Ztöð 2 og auðvitað Ómega. Hvernig höfum við getað verið án Ómegu allan þennan tíma?

Kannski ef við komum okkur upp góðri sjónvarpsfíkn þá getum við látið það koma í staðinn fyrir að eiga vini og fara út úr húsi og eyða peningum? Væri það ekki frábært?

Húrra fyrir sparnaði! Húrra fyrir sjónvarpi!

Uppfært: Allt gengur samkvæmt áætlun. Ég er nú búinn að vera með PoppTíví í heila klukkustund, er búinn að sjá einn South Park þátt og hef hvorki eytt neinum peningum né drukkið neitt rauðvín! Jess!