Jæja, kjaftæðið sem haldið var á lofti á ráðstefnunni í gær um er farið að leka út í fjölmiðla og eitra hugi landsmanna. Af Textavarpinu (síðu 110):

NAUÐGANIR FLEIRI OG GRÓFARI UNDANFARIÐ
Grófari nauðganir og fleiri hópnauðgan-
ir hafa verið tilkynntar til Neyðarmót-
töku Landsspítalans á síðustu árum.
Guðrún Agnarsdóttir, forstöðumaður
Neyðarmóttökunnar, segir að vart hafi
orðið við breytingu til hins verra á
síðustu árum sem talin er fylgja auknum
kynlífsiðnaði.

Nærri 200 manns sóttu ráðstefnu sem
haldin var í Reykjavík í gær í tengslum
við átak gegn verslun með konur. Guðrún
hélt þar erindi um áhrif kynlífsiðnaðar
á ungar stúlkur. Hún segir ofbeldis-
dýrkun hafa aukist og það verði starfs-
fólk Neyðarmóttökunnar vart við. Hún
segir að mikið skeytingarleysi, ást-
leysi og lítilsvirðing á fólki sé bund-
ið kynlífsiðnaði og það smiti út.

Það magnaða við erindi Guðrúnar er að hún rökstuddi fullyrðingar sínar um skaðsemi "klámvæðingarinnar" ekki neitt. Hún sagði bara frá þeirri sorglegu (og eflaust sönnu) staðreynd að ofbeldi og nauðganir séu orðnar grófari, fórnarlömbin yfirleitt ung og viðkvæm. Svo kenndi hún kynlífsiðnaðinum (klámi) um allt saman, án þess að færa fyrir því rök.

Engar rannsóknir, engin vísindi - bara skoðun miðaldra konu sem sér ekkert nema verstu hliðar sjúks kynlífs daginn út og daginn inn. Það sem komst næst rökstuðningi hjá henni var að benda á að kynlífsiðnaðurinn í Osló væri svipaður og hér og að ofbeldið væri orðið svipað líka. En það segir ekkert um tengsl þessara tveggja þátta, það er bara ein margra birtingarmynda þess að samfélag Norðmanna á margt sameiginlegt með samfélagi okkar. Fyrirlestur Guðrúnar var sorglegur á margan hátt.

Og auðvitað er það þetta sem fjölmiðlar ákveða að vitna í í fréttum sínum, í staðinn fyrir að draga fram athyglisverða og uppbyggilega punkta úr fyrirlestrum erlendu fyrirlesaranna. Líklega af því að fyrirsögnin er svo spennandi.

Klám og ofbeldi, ofbeldi og klám.

Uppfært: Hér er grein sem lýsir ágætlega af hverju ég tortryggi áróður á borð við Guðrúnar. Margar alvöru rannsóknir benda nefnilega til þess að fólk hafi hreinlega gott af klámi. Þá gefur auga leið að fólk hefur ekki gott af því að klám sé bannað og "klámvæðingunni" snúið við. Auðvitað eru til allskonar rannsóknir sem sýna allskonar hluti - en málið er miklu, miklu flóknara en Guðrún og hennar skoðanasystur vilja láta.