Hversu oft heyrir maður þessi tvö orð saman í setningu? Mér finnst ég alltaf vera að heyra þau saman og ég kippi mér ekkert upp við að sjá þau hlið við hlið á prenti. Klám og ofbeldi.

Hvernig væri það að tala alltaf um skó og barnaþrælkun? Prófaðu þetta í heilan dag... alltaf þegar einhver (t.d. þú) minnist á skó, passaðu að koma barnaþrælkun að og öfugt. Ekki láta það trufla þig þó nærstaddir starfsmenn skóbúða eða starfsmenn X18 verði pirraðir.

Skór hafa nefnilega nákvæmlega jafn mikið með barnaþrælkun að gera, og klám hefur með ofbeldi. Hægt er að framleiða klám með því að beita leikurum ofbeldi. Það er eflaust gert í einhverjum tilfellum. Alveg eins og það er hægt að framleiða skó með þrælkunarvinnu. Sem er líka gert. Skítt með það þó það sé ekki alltaf gert... það er nauðsynlegt að draga vandann fram í dagsljósið og bregðast við honum.

Skór og barnaþrælkun. Skór og barnaþrælkun.

Ég er ekki frá því að það þurfi að vernda fólk gegn skóm og barnaþrælkun. Sérstaklega börnin.