Mér fannst eiginlega bara sorglegt að sjá Múrinn og Deigluna birta pistla með nauðalíku innihaldi sama daginn, þar sem því var haldið fram að geimferjuslys séu barasta ekkert sérstaklega sorgleg miðað við það sem gengur og gerist dags daglega í þessum harða heimi. Ég er ákaflega ósammála inntaki þessara greina - geimferjuslys eru að mínu mati alveg sérstaklega sorgleg slys.

Það er ekki vegna þess að ég tel geimfara vera mikið betra fólk heldur en annað fólk, heldur vegna þess að ég met mikils þau vísindi sem geimferðirnar tákna. Slys af þessu tagi geta dregið úr stuðningi ríkisstjórna og almennings við geimferðaráætlanir og þar með gert starf vísindamanna þeim mun erfiðara. Mér finnst það miður.

Geimferðir og tæknin sem hefur þróast í kringum þær hafa fært okkur allskyns hluti sem við nýtum dags daglega. Það er gömul (og góð) lumma að fullyrða að kúlupennar og strigaskór hafi orðið til í tengslum við geimferðaráætlun NASA, en það er til fullt af nýlegri dæmum líka. Til dæmis þessi vefur - vélin sem hýsir hann hefur í iðrum sínum hugbúnað sem varð til að sumu leyti innan veggja NASA. Svo eru gervitunglin kapituli alveg út af fyrir sig. Gervitungl eru gríðarlega mikilvæg tæki, bæði fyrir leik (sjónvarp...) og starf (sími, netsambönd, staðsetningartæki). Ég leyfi mér t.d. að slá því fram hér algjörlega an neinna heimilda að GPS tæknin ein sér hafi pottþétt bjargað fleiri mannslífum heldur en hafa farist í geimferðum NASA frá upphafi.

Jákvæðar afleiðingar geimferða eru út um allt.

Þeir hjá NASA og systurstofnunum þess í öðrum löndum eru að kljást við sum erfiðustu og mest krefjandi vandamálin sem mannkynið hefur tekist á við. Við slíkar aðstæður er nýsköpun alveg geysileg, tækni og þekking er þróuð sem hægt er að hagnýta á öðrum vettvangi og bæta þannig líf okkar allra.

Svo er þetta bara töff - það er flott og spennandi að reyna að rannsaka himintunglin. Geimferðir rokka.

Mér finnst ótrúleg skammsýni hjá höfundum þessara tveggja greina að hundsa þessi atriði. Er virkilega svona algengt að íslenskur almenningur beri ekki virðingu fyrir og sjái yfir höfuð ekki tilgang með vísindum? Það er dapurlegt ef svo er. Svona vitleysa er allavegna ekki til þess að bæta álit mitt á pólitísku vefritunum!