Hann Sverrir skorar á okkur Má að taka afstöðu til þess hvenær sé siðlegt og hvenær sé ósiðlegt að tengja á efni á vefnum, í framhaldi af skemmtilegri umræðu á síðunni hennar Ásu.

Már tók reyndar ágætis pól í hæðina hér, en hann sagði orðrétt:

En þótt veftenglar geti seint eða aldrei varðað við höfundarlög (eða önnur lög) þá held ég að við getum samt öll verið sammála um að stundum er það dónalegt og ósiðlegt að linka á ákveðnar síður - sérstaklega síður þar sem höfundurinn virðist hafa óvart sett á netið og gleymt að læsa þeim.

Þessu er ég sammála.

Ég er hinsvegar ósammála Sverri að blogg sé í eðli sínu persónulegt og eigi ekki erindi í fjölmiðla, einfaldlega vegna þess að það er jafn misjafnt og bloggsíðurnar eru margar. Sumir vilja athygli og þrífast á henni og aðrir vilja fá að vera út af fyrir sig.

Það er í hæsta máta óeðlilegt að krefjast þess að sá sem slysast inn á vefsíðu fari út í hugsanalestur til að meta í hvorn flokkinn höfundurinn lendir - hvort hann sé athyglissjúkur eða feiminn. Eðlilegast er að álykta að hann vilji athygli, því feiminn einstaklingur ætti að hafa vit á að halda ekki úti persónulegri vefsíðu.

Ef höfundurinn ætlast til einhvers annars af lesendum sínum, þá verður hann að taka það fram á síðunni - eins og Sverrir gerir í titli vefsins síns. En ef höfundurinn tekur ekkert fram, þá verður hann bara að sætta sig við að vefur hans sé túlkaður eftir almennum hefðum og venjum netsamfélagsins.

Og þó að höfundurinn taki fram óskir sínar, þá verður hann samt að horfast í augu við það að lagalegur réttur hans er takmarkaður og það eru líka siðferðisleg takmörk fyrir því hvað hann getur ætlast til af lesendum sínum. Ef hann er ósáttur hvernig vefurinn virkar (vill ekki linka, vill ekki umfjöllun, vill ekki ókunnuga gesti, ...), þá þýðir það í raun að hann vill ekki taka þátt í vefsamfélaginu á jafnréttisgrundvelli. Sá höfunduer væri að gera sér og öðrum greiða með því að kynna sér aðra miðla, t.d. tölvupóstsendingar eða bara blað og penna.

Hvað tengingar varðar, hefur þetta það í för með sér að mér finnst almennt ekki ósiðlegt að tengja á skrif annarra nema það sé gert í meinfýsnum tilgangi - til dæmis með það að markmiði að niðurlægja eða gera illkvittnislegt grín að einhverjum eða hafa af honum auglýsingatekjur. Tengingin er í eðli sínu hlutlaus og eðlilegur hluti af umræðu á vefnum. Það skiptir hinsvegar öllu máli með hvaða hugarfari þessu verkfæri (eins og öðrum) er beitt.

Mér finnst hann Sverrir til dæmis ekki geta ætlast til þess að ég tengi ekki á hann, þegar hann skorar á mig á vefnum sínum. Enda geri ég það hiklaust, þó hann hafi lýst yfir að hann vilji ekki slíka athygli (ég lít n.b. á opinn hluta vefsins míns sem fjölmiðil). Ég lít reyndar líka á RSS molana sem fjölmiðil, en Sverrir hefur verið skráður þar lengi og hefur samt aldrei beðið um að vera fjarlægður (ég hefði orðið við því í hvelli). Er þetta ósiðlegt af mér? Mér finnst það ekki.

Annars vona ég að Sverrir sjái bara að sér og læri bara að elska sviðsljósið. Mér finnst skrif hans oft á tíðum skemmtileg og umhugsunarverð, þó mér sýnist ég vera ósammála honum um þetta tiltekna atriði. :-) Sverrir minntist til dæmis á ýmislegt annað áhugavert í dag - hann reynir að lita umræðuna hjá henni Ásu einhverjum kynjalitum og veltir fyrir sér hvort til sé einelti á netinu. Allt efni í skemmtilega pistla sem verða að bíða betri tíma.