Eitthvað hlýtur hann Geir að hafa orðað hlutina sorglega illa til að fá þá félaga hjá TAL til að flokka tilraunir mínar með SMS-tengda forritun sem misnotkun. Auðvitað veit ég í raun ekki hvað fór þeim á milli, en það er ekki laust við að ég sé pirraður yfir því að leikirnir mínir séu kynntir fyrir forsvarsmönnum TALs á svona óheppilegann hátt. Andvarp.

Þetta er nefnilega hallærislega viðkvæmt mál. Stjórnendur fyrirtækja eiga ákaflega erfitt með að sleppa beislinu, leyfa hlutum að þróast af sjálfu sér. Þeir eru íhaldssamir (eðlilega, myndir þú treysta nýjungagjörnum glanna fyrir þínu fyrirtæki?). Það er auðvitað pirrandi fyrir mann eins og mig (nýjungagjarnan glanna) að mæta skilningsleysi slíkra manna - pirringur sem endurspeglaðist því miður í síðustu samskiptum mínum við TAL (þar sem m.a. kom fram að ekki var búið að skilgreina hugtakið "misnotkun" í þessu samhengi - ætli það hafi breyst?).

En það er einmitt pirrandi því ég held að það sem ég er að gera sé mjög góð auglýsing fyrir TAL - tólin mín virka best með gátt TALs og fyrir þá sem vilja nota þau getur það verið næg ástæða velja TAL framyfir samkeppnisaðila þeirra. Og þetta kostar TAL ekki krónu - í versta falli þýðir þetta að þeir eiga erfiðara með að rukka fyrir það sem ég hef gert ókeypis. Ég er sannfærður um að það ímyndaða "tap" jafnist engan veginn á við þann gróða sem þeir gætu uppskorið með því að einmitt hvetja fiktara eins og mig til að búa til hluti sem virka eingöngu (eða best) fyrir þá sem eru í áskrift hjá TAL. Ánægðir viðskiptavinir, sem tala vel um fyrirtækið og vilja skipta við það eru mjög, mjög verðmætir. Ég er að búa til svoleiðis fyrir TAL. Hvernig getur það talist vera misnotkun?

Og ekki var það ég sem bjó þessar opnu SMS gáttir til. Ég er bara að hjálpa mönnum að nýta þær betur... og það í góðri trú um að það væri bara hið besta mál fyrir alla.

En varðandi "samningaviðræðurnar" sem Geir minntist á - enginn hefur haft samband við mig. Ætti ég að hafa samband við þá?