Ég ákvað að hafa samband við bróður minn sem er laganemi til að athuga hvort að það væri til eitthvað einfalt svar við þessu. Svo er ekki, en hann komst helst að þeirri niðurstöðu að staða rafrænna gagna sem eru í geymslu þriðja aðila sé ólögákveðið tilfelli og fari þá eftir samningum milli arfleifanda og þessa þriðja aðila.

Erfðalög (http://www.althingi.is/lagas/130b/1962008.html) fjalla um hvernig eignir erfast. Það hefur verið skilgreint þannig að andlag erfða taki aðeins til fjármuna og fjármunaréttinda arfleifanda en ekki upplýsinga eins og mynda eða texta (að því gefnu að þær upplýsingar hafi ekki fjárhagslegt gildi). Allt sem má meta til verðmæta fellur undir erfðalög og verður að afhenda erfingjum.

Hins vegar er margt sem fellur til við andlát sem hefur ekki fjárhagslegt gildi og erfðalög taka ekki til. Hvað varðar upplýsingar í geymslu þriðja aðila þá taldi bróðir minn að lög um persónuvernd og meðferð persónuupplýsinga (http://www.althingi.is/lagas/nuna/2000077.html) hafi ekki þýðingu þar sem samþykki viðkomandi er alltaf fyrir hendi.

Þar sem lögin ná ekki til þessara aðstæðna þá fer málið eftir samningi aðila. Sem sagt, ef Bjarni sem eigandi vélarinnar klaki.net setur einhverjar reglur þá gilda þær. Stóru netveiturnar hafa ekki ákvæði í skilmálum sínum sem taka beint á þessu svo ég gæti séð (Vodafone / Síminn). Þær eru báðar með ákvæði um að viðskiptavini sé óheimilt að lána eða gefa þriðja aðila upp lykilorð sitt, en það bannar netveitunum ekki að gefa það upp til þriðja aðila. Dánarbú taka við fjárhagslegum skyldum og réttindum arfleifanda en þar er aftur meginreglan að verið er að tala um fjárhagsleg verðmæti.

e

[ Gerði alþingistengla virka - bre ]