Það er, utan heims stærðfræðinnar, nánast útilokað að "vita" að eitthvað sé ekki til. Til að sanna að eitthvað sé ekki til þarftu annaðhvort að sýna fram á að tilvist þess leiði til mótsagnar eða að hreinlega leita tæmandi dauðaleit að því (og finna ekki). Alheimurinn er of stór til að síðarnefnd tækni sé fýsileg og of flókinn til að fyrrnefnd tækni gangi upp nema í nokkrum jaðartilfellum.

Þú getur hinsvegar fært góð rök fyrir að það sé mjög, mjög ólíklegt að fljúgandi bleikir fílar séu til á þessari plánetu - og trúað því í krafti rakanna. Slíkar niðurstöður geta verið mjög marktækar og gagnlegar.

En þær byggja samt á þínum skilningi á hvernig heimurinn virkar, sem er í flestum tilfellum blind "trú", því ekki hefurðu sjálfur haft fyrir því að staðfesta nema lítið brot af þeirri vitneskju sem skapar þína heimsmynd. Þessi niðurstaða byggir líka á því að þú trúir að heimurinn sé rökréttur og rök geti leitt til niðurstöðu.

Það er alveg hægt að vita hitt og þetta (það verður reyndar erfiðara og erfiðara ef maður fer að velta fyrir sér hvort maður sé kannski geðveikur og ímyndunarveikur), en flest sem við teljum okkur "vita" er eitthvað sem við trúum bara af því að okkur var sagt það.