Mjög jákvætt að þú hafir bent á þetta án þess að notfæra þér þetta sjálfur þér til framdráttar í prófi (enda auðvelt að tékka á því seinna meir hvort að þú hafir lesið skjalið eður ei). Varðandi tilkynningaskylduna þá hefði verið eðlilegast að gera þetta eins og almennt er gert á til dæmis Bugtraq (póstlisti um öryggisholur í forritum ýmiss konar). Þegar að hola er uppgötvuð er fyrst haft samband við framleiðandann og honum bent á. Ef að framleiðandinn svarar ekki eða gerir ekkert í málinu (oft miðað við að fá amk svar eftir 7 daga) þá er póstur sendur á Bugtraq þar sem bent er á villuna og sagt frá viðbrögðum framleiðanda. Það hefði verið rétta leiðin í þessu máli (að mínu mati), sumsé að hafa strax samband við kennara/RHÍ, og aðeins ef að þeir hefðu ekki gripið til réttra aðgerða, að segja þá frá þessu. Það er líka í lagi að segja frá gatinu EFTIR að búið er að stoppa í það ("véla- og verkfræðinemi stoppar í gat"), og stuðla þar með að því að fleiri athuguðu sín öryggismál, en að segja frá þessu um leið og gatið fannst var pínulítið óábyrgt.

Er það ekki bara þetta sem þú ert að sækjast eftir:

Páll ber lof á nemann sem lét vita af hinu umrædda prófi og segir hann hafa brugðist hárrétt við.

Það sem þú gerðir var mjög gagnlegt. Það sem JBJ segir er hinsvegar líka rétt - það hefði verið mun eðlilegra af þér að láta kennarana vita, en fresta því að birta umfjöllun á heimasíðunni þinni þar til próftímabilinu væri lokið. Að birta hana strax ber vott um vangá og athyglissýki.

Ég var að benda á að það sem þú lagðir upp með - að "sörfa" á heimasvæðum annarra eins og ekkert væri sjálfsagðara - er frekar ósiðlegt, í ljósi þess að fæstir vita að þeir þurfi að hafa fyrir því að læsa heimasvæðum sínum. Þú vissir alveg að þú gætir fundið eitthvað krassandi. Þú lést ekki duga að athuga hvort væri læst, heldur gekkst inn um ólæstu dyrnar og skoðaðir innihald heimasvæðanna og undirmappa þeirra. Það sem þú gerðir er námkvæmlega sambærilegt við að labba inn í annarra manna hús, skoða sig um, en standast svo þá freistingu að lesa dagbókina sem liggur á skrifborðinu.

Auðvitað var gott hjá þér að standast freistinguna og gott hjá þér að láta vita. En gerðiru svo meiri skaða með því að gera upplýsingarnar opinberar svona fljótt? Afsakar eitthvað af þessu afbrotið sem fór á undan? Helgar tilgangurinn meðalið? Ég veit ekki svarið, ég bara spyr...

Þú afsakar vonandi hvað ég er leiðinlegur við þig núna - en ég hef verið að vinna við kerfisstjórn af ýmsu tagi í mörg ár og hef mjög sterkar skoðanir á þessum málum. Ef einu raddirnar sem heyrast eru að segja "ú, hvað Arnar er klár og frábær!" þá styrkir það fólk bara í trúnni að svona dónaskapur sé til fyrirmyndar. Hann er það ekki.